logo
Blog single photo

Մանվել Գևորգյանն այսօր կդառնար 23 տարեկան

Այսօր ապրիլյան պատերազմի անմահ հերոս Մանվել Գևորգյանի ծննդյան օրն է։ Այսօր նա կդառնար 23 տարեկան։ Մանվելը զոհվեց Արցախի Մարտունու շրջանի մարտական դիրքերից մեկը պաշտպանելու ժամանակ։

Մանվել Գևորգյանը ծնվել է 1997 թ.-ին, Երևան քաղաքում: 2003 թ.-ից սովորել է Երևանի թիվ 198 ավագ դպրոցում, որն ավարտել է 2014 թվականին։ Նույն տարում ընդունվել է Երևանի ֆիզիկական կուլտուրայի հայկական պետական ինստիտուտի ադապտիվ ֆիզկուլտուրայի բաժինը: 2005 թ.-ից զբաղվել է կարատեով։ 2006 թ.-ին եղել է Եվրոպայի առաջնության չեմպիոն։

2015 թ.-ին հուլիսի 7-ին զորակոչվել էր բանակ։ Ծառայում էր Արցախում: Ստացել էր կրտսեր սերժանտի կոչում։

2016 թ.-ի ապրիլի 1-ի լույս 2-ի գիշերը Ադրբեջանի Հանրապետությունը հարձակում է գործում Արցախի Հանրապետության վրա։ Մանվել Գևորգյանը ապրիլի 1-ից եղել է դիրքերում: Ապրիլի 14-ին շուրջ 30 անդամից բաղկացած ադրբեջանական խումբը հարձակում է գործում դիրքի վրա։ Դիրքում եղել են երկուսով և կապի ոչ մի միջոց չունենալով չեն կարողացել զեկուցել իրավիճակի մասին։ Երկուսով անցել են պաշտպանության, թշնամու նռնակից զոհվել է ընկերը, միայնակ մնալով շարունակել է դիրքի պաշտպանությունը, սկսելով կրակել շարժական թիրախի ձևով, որպեսզի թշնամին մտածի, թե դիրքում մի քանի զինվոր կա։ Նկատելով, որ փամփուշտները վերջանում են, սկսում է լիցքավորել և լիցքավորման ժամանակ զոհվում է ձախ կողքի շրջանում հրազենային վնասվածքից:

Հետմահու Մանվել Գևորգյանը ԼՂՀ նախագահ Բակո Սահակյանի կողմից պարգևատրվել է ԼՂՀ «Արիության», իսկ  ՀՀ նախագահ Սերժ Սարգսյանի կողմից՝ «Մարտական ծառայություն» պետական մեդալներով:

Top