logo
Blog single photo

ՃԱԿԱՏԱԳՐԻ ԱՄԵՆԱՔԱՂՑՐ ՆՎԵՐԸ

<<ԱՄԱՐԱՍ>>թերթ, 2003թ./28 հունիսի/   Հեղինակ՝ Մերսեդես Հարությունյան

Նրա մասին գրելու համար հարկավոր են շատ գեղեցիկ բառեր ու արտահայտություններ,որովհետև կատարյալ բժշկի և գեղեցիկ հոգու տեր կնոջ մասին չես կարող ամենօրյա գործածական խոսքեր օգտագործել, բայց, այնուամենայնիվ,չեմ ուզում, այն ինչ-որ գրելու եմ, գունազարդել ու պատկերախողդ անել:

Այո՛,բժշկուհու մասին ես շատ վաղուց էի ուզում գրել, սակայն չէի համարձակվում: Հոգուս մի անկյունում կարծես անբացատրելի վախ կար:Իմ հիշողության մեջ միշտ թարմ կմնա այն գիշերը, երբ ժամը 2-ին ինձ օգնության հասավ հենց ինքը՝ բժշկուհի Արզումանյանը:

Ո՛չ միայն ինձ, այլ բոլորին, շա՜տ շատերին:

Քանի՜,  քանի՜ մարդու է օգնության հասել, բուժել, և օգնել վայելելու կյանքի բերկրանքը: Այսօր երևի հարյուրավոր մարդիկ կցանկանային իրենց սրտի խոսքը հղել ու շնորհակալություն հայտնել նրան:

Մեր զրույցի ժամանակ ես զգացի,որ խոսում եմ անկեղծ, անաչառ մի կնոջ հետ, որն իրեն համարում է երջանիկ , որովհետև ունի լավ ընտանիք՝  դուստրեր ու որդիներ, և նորածին թոռնիկ,որին շա՜տ երկար է սպասել:

Երջանիկ է, որովհետև սիրում է իր աշխատանքը, և  դա համարում է <<ճակատագրի ամենաքաղցր նվերը>>: Նրա համար երջանկություն է նաև հիվանդների առույգ տեսքը, լավ առողջական վիճակը, թեկուզ երբեմն անկարող է լինում ինչ-որ բան անել. Տառապող հիվանդի մահճակալի մոտ: Ըստ պատմածների նա երբեք հոգնածություն չի զգում,նույնիսկ ամենադժվար պահերին, եթե կանչ է լինում, պատրաստ է ամեն ինչ թողնել ու շտապել հիվանդի մոտ:

Բժշկուհին միշտ երազել է աշխատել մի այնպիսի հիվանդանոցում, որտեղ կան բոլոր անհրաժեշտ սարքավորումները,որտեղ սանիտարական աշխատանքները հասցված են կատարելության…

Բժշկուհին մեծ սեր ունի բնության նկատմամբ: Սիրում է հայ ժողովրդական,ազգագրական երգեր, դասական երաժշտություն, գրականություն,արտասանեց <<Մեր տան Աստվածն է մայրս>> հանրահայտ բանաստեղծությունը:

Միշտ սիրել է մանուկներին ու երևի հենց դա էր պատճառը,որ մեծ դստերը՝ Ելիզավետային , խորհուրդ է տվել դառնալ մանկաբույժ:

Տիկին Խալիսան շատ հպարտ է, որ դուստրը գնացել է իր  հետքերով , և այսօր Երևանի հիվանդանոցներից մեկում հարգանք է վայելում:

Մեր զրույցի վերջում նա՝  ամբողջ աշխարհի երեխաներին խաղաղություն մաղթեց, անամպ երկինք և ամենակարևորը, որ ո՛չ մի տեղ, ո՛չ մի երկրում <<Արցախյան գոյամարտը>> չկրկնվի…

Հուսանք,որ ամեն ինչ լավ կլինի:

 

Top